Present Perfect

រឿងថៃ ឆ្នាំ២០១៧

ទើយ បានធ្វើដំណើរកំសាន្តម្នាក់ឯងទៅ ហ៊ីហ្គាស៊ីកាវា ប្រទេសជប៉ុន បន្ទាប់ពីគេបែកគ្នាជាមួយនិងមិត្តស្រីរបស់គេ។ គេមកទីនេះ ព្រោះគិតថាវាជាកន្លែងដែលជនជាតិថៃមិនសូវមក គេមិនចង់ជួបជនជាតិថៃមួយរយៈ។

ទើយ បានជួលផ្ទះនៅ រីសត មួយនៅទីនោះ សម្រាប់ការស្នាក់នៅប្រហែលជាមួយអាទិត្យ។

ក្រោយមក ទើយ បានជួបនឹង អូត ដែលជាជនជាតិថៃដូចគ្នា ស្នាក់នៅក្បែរគ្នា។ អូត មកកំសាន្តនៅទីនេះម្នាក់ឯងដែរ ដើម្បីបន្ធូរអារម្មណ៍មុនពេលត្រលប់ទៅប្រទេសថៃវិញ ហើយរៀបការនឹងមិត្តស្រីក្នុងរយៈពេលបួនសប្ដាហ៍ខាងមុខ។

ថ្ងៃបន្ទាប់ មិត្តរបស់ ទើយ បានប្រាប់ ទើយ តាមទូរសព្ទ៌ពីដំណឹងជិតភ្ជាប់ពាក្យរបស់សង្សារចាស់ ទើយ។ អូត ឃើញ ទើយ មិនសប្បាយចិត្ត ក៍នាំ ទើយ ទៅផឹកស្រារំសាយជាមួយគ្នា។

តែប្រហែលជាផឹកច្រើនពេករហូត ទើយ ស្រវឹងចាំអ្វីមិនបាន។ ពេលភ្ញាក់ដឹងខ្លួនម្ដងទៀត ទើយ បានឃើញគេកំពុងគេងនៅលើគ្រែជាមួយ អូត ទៅហើយ ថែមទាំងគ្មានខោអាវទៀតផង។ ព្រោះតែភាពមិនច្បាស់ ទើយ ក៏សម្រេចចិត្តសួរ អូត ថាតើពួកគេទាំងពីរមានបានធ្វើអ្វីលើសពីការគេងជិតគ្នាឬអត់។ អូត បដិសេធ។ ទើយ ថាគេនឹងមិនសូវបារម្មណ៍ប្រសិនបើយប់នោះជាមនុស្សស្រី។ អូត អន់ចិត្ត តែមិនបាននិយាយចេញមកទេ គេគ្រាន់តែលា ទើយ ទៅមុន។

ស្អែកឡើង ទើយ បានទៅបបួល អូត ទៅផ្សារមុនម្ដង ព្រោះរាល់ដង អូត តែងតែជាអ្នកមកបបួល ទើយ មុន។ ពួកគេក៍បានទៅដើរលេងជាមួយគ្នា និងនិយាយរឿងក្នុងចិត្តខ្លះៗ។ យប់ដដែល អូត បានថើបមាត់លា ទើយ។ ទើយ មិនបានបដិសេធនោះទេ ទើយ ក៏បានថើបតបវិញ។

ទំនាក់ទំនងរបស់ពួកគេចាប់ផ្ដើមល្អឡើង។ ពួកគេចាប់ផ្ដើមទៅណាមកណាជាមួយគ្នា ហើយ អូត ក៏មកគេងនៅកន្លែងរបស់ ទើយ ផងដែរ ពួកគេថែមទាំងងូតទឹកក្នុងអាងជាមួយគ្នាទៀតផង។

នៅថ្ងៃញ៉ាំបាយថ្ងៃត្រង់ជុំគ្នាមួយ ពេលនិយាយដល់រឿងមានកូន ធ្វើអោយ អូត នឹកឃើញពីសង្សារខ្លួនដែលកំពុងតែពរពោះ។ នៅយប់នោះ អូត បានប្រាប់ ទើយ ថាគេមិនគេងនៅកន្លែង ទើយ ទេ។ គេចង់ទៅគេងនៅកន្លែងរបស់គេវិញ ព្រោះគេមានអារម្មណ៍ថាខុសឆ្គង។

ទើយ ពិតជាច្របូកច្របល់ណាស់ គេក៏ជិះកង់ចេញទៅក្រៅម្នាក់ឯង ហើយលង់លក់នៅតាមផ្លូវសាធារណៈអស់មួយយប់។ ព្រឹកឡើង ពេលត្រលប់មកវិញ អូត ក៍បានចាកចេញទៅហើយ បន្សល់ទុកតែកន្សែងបង់ក និងសារខ្លីមួយអោយ ទើយ។ ទើយ ខូចចិត្តជាថ្មី។

ច្រើនឆ្នាំកន្លងផុតទៅ ទើយ ក៍បានជួប អូត ម្ដងទៀត នៅព្រលានយន្តហោះ ខណៈពេលដែល ទើយ ធ្វើដំណើរកំសាន្តម្នាក់ឯងម្ដងទៀត។ អូត បានណែនាំអោយ ទើយ និងគ្រួសាររបស់គេស្គាល់គ្នា។ មានប្រពន្ធនិងកូនប្រុសរបស់ អូត។ អូត ក៍បានសុំគណនីហ្វេសបុករបស់ ទើយ ហើយ Add ទៅ ទើយ។ 

នៅពេលដែលពួកគេទៅអស់ ទើយ ក៏ចូលមើយគណនីហ្វេសបុករបស់ អូត។ តែ ទើយ ស្ទាក់ស្ទើរក្នុងការ ទទួល Friend Request របស់ អូត៕