Top ឬក៏ Bottom?

តើអ្នកធ្លាប់ត្រូវបានគេសួរសំនួរ "Top ឬ Bottom" អត់?

មនុស្សជាច្រើនប្រាកដ៏ជាបានយល់ហើយ ថាTopសំដៅទៅលើបុរសស្រលាញ់ភេទដូចគ្នាដែលមានលក្ខណៈរឹងមាំ និងមានភាពជាបុរសជាង។ ឯBottom វិញសំដៅទៅលើបុរសស្រលាញ់ភេទដូចគ្នាដែលមានភាពទន់ដូនជាមនុស្សស្រីច្រើន។ បើនិយាយអោយចំនោះ Top ដើរតួរជាបុរស និងBottom ដើរតួរជាស្ត្រី នៅក្នុងរឿងស្នេហា និងជីវិតផ្លូវភេទ។

នៅក្នុងកម្មវិធីសម្រាប់ស្វែងរកគូរ ភាគច្រើនគេតែងតែសួរសំនួរនេះនៅពេលចាប់ផ្ដើមការជជែកកំសាន្ត «អ្នកឯជា Top ឬ Bottom?»

តើអ្នកយល់យ៉ាងណានៅពេលត្រូវបានគេសួរសំនួរបែបនេះ? 

មនុស្សភាគច្រើនប្រហែលជាយល់ថាវាជារឿងធម្មតាក្នុងការស្វែងយល់ពីភាគីម្ខាងទៀតមុនពេលកិច្ចសន្ទនាទៅឆ្ងាយជានេះ និងមិនខាតពេលវេលាក្នុងការទាក់ទងមនុស្សខុសពីតម្រូវការដែលខ្លួនចង់បាន។ ហើយពួកគេតែងតែបញ្ចប់ការជជែកភ្លាមៗនៅពេលដែលដឹងថាដៃគូមិនមែនជាអ្វីដែលពួកគេរំពឹងទុក។

តែអ្នកមានធ្លាប់គិតអត់ ថាវាជាសំនួរដែលមិនគួរសួរទាល់តែសោះ ព្រោះសំនួរប្រភេទនេះហាក់ដូចជាការសួរពីវិធី ឬចំណង់ចំណូលចិត្តក្នុងការរួមភេទរបស់ដៃគូរសន្ទនាទៅវិញ។ តើវាពិតជាចាំបាច់ និងសមគួរឬទេ ក្នុងការសួរសំនួរបែបនេះទៅមនុស្សដែលទើបតែស្គាល់ ឬគ្រាន់តែចាប់ផ្ដើមជជែក? 

ក្រែងគេនិយាយថា «ស្នេហាវាគ្មានភេទនោះទេ ហើយការស្រលាញ់ក៏មិនកំណត់ភេទដែរ» ចុះហេតុអ្វីយើងចាំបាច់ត្រូវសួររកតួនាទីភេទរបស់នណាម្នាក់ជាការចាប់ផ្ដើមសន្ទនា? ហេតុអ្វីយើងមិនព្យាយាមស្គាល់ពីគ្នាជាមុន?

តើអ្នកធ្លាប់គិតបែបនេះអត់ ថាការសួររកតួនាទីភេទ Top ឬ Bottom នេះគឺជាការសួររកដៃគូររួមភេទ ជាជាងការព្យាយាមរកដៃគូរជីវិតពិតប្រាកដ៍?

តាមពិតទៅ នៅពេលដែលយើងស្រលាញ់នណាម្នាក់ តួនាទីភេទពិតជាមិនចាំបាច់នោះទេ។ អោយតែដៃគូរពីរនាក់ចុះសម្រុងនឹងគ្នា​ និងពិតជាស្រលាញ់គ្នា ពួកគេប្រាកដ៏ជាស្មាក់ចិត្តបំពេញតម្រូវការអោយគ្នាជាក់ជាមិនខាន។ គិតមើល យើងមិនខ្វល់សូម្បីតែគេជាបុរសដែលមានភេទដូចយើង រឿងអ្វីដែលតួនាទីភេទជាបញ្ហានោះ!