មិនសមហេតុផល ប៉ុន្តែបែរជាធម្មតា

នៅពេលដែលមានពត៌មានពីការរៀបការរបស់ក្រុមអ្នកស្រលាញ់ភេទដូចគ្នានៅលើអ៊ិនធើណេត យើងតែងតែបានឃើញមានអ្នកចូលទៅសរសេរអបអរសាទរដល់ថ្ងៃមង្គលរបស់ពួកគេ។ វាពិតជាគួរអោយរីករាយណាស់សម្រាប់អ្នកស្រលាញ់ភេទដូចគ្នាគ្រប់រូប ដែលមានមនុស្សជាច្រើនចូលរួមអបអរ​ និងកាន់តែពិសេសជាងនេះទៅទៀត គឺនៅពេលដែលក្នុងនោះក៏មានអ្នកស្រលាញ់ភេទផ្ទុយមួយចំនួនបានព្យាយាមយល់ និងទទួលស្គាល់ការស្រលាញ់ដែលមិនដូចពួកគេ។

វាក៏មិនជាបញ្ហាអ្វីដែរ ដែលមនុស្សខ្លះមិនយល់ស្របនូវអ្វីដែលពួកគេយល់ថាមិនត្រឹមត្រូវ។ តែអ្វីដែលចម្លែកនោះ គឺមនុស្សខ្លះបែរជាជ្រើសរើសការជេរប្រមាថ ឬសើចចំអកឡកឡាយអោយអ្នកដែលមានគំនិតមិនដូចខ្លួនទៅវិញ។ អ្វីដែលកាន់តែគួរអោយភ្ញាក់ផ្អើលជាងនេះទៅទៀតនោះ បែរជាមានមនុស្សច្រើនគួរសមដែរ ដែលគិតថានេះជាទង្វើរត្រឹមត្រូវ ហើយចូលរួមក្នុងការសរសេរពាក្យមិនសមរម្យទាំងនោះឡើងមក ហាក់ដូចវាជារឿងធម្មតាទៅវិញ។

កាលពីច្រើនសប្ដាហ៍មុន ខ្ញុំបានឃើញអ្នកស្រលាញ់ភេទផ្ទុយមួយចំនួន ចូលទៅសរសេរសារជូនពរ និងសម្ដែងការអបអរចំពោះការទទួលបានការរៀបការស្របច្បាប់ សម្រាប់ក្រុមអ្នកស្រលាញ់ភេទដូចគ្នានៅ តៃវាន់។

«ខ្ញុំគឺជាអ្នកស្រលាញ់ភេទផ្ទុយ។ ខ្ញុំក៏មានកូនផងដែរ។ ប៉ុន្តែខ្ញុំនៅតែគាំទ្រពួកគេ។ ស្រលាញ់ គឺស្រលាញ់។» បុរសម្នាក់ចូលមកបញ្ចេញមត្តិ ដែលនៅក្នុងរូបថតគណនីរបស់គាត់ មានរូបជាគ្រួសារ។ មានរូបរបស់គាត់ ជាមួយភរិយា កូនប្រុស និងកូនស្រីរបស់គាត់ផងដែរ។ «ខ្ញុំមិនប្រកាន់ថាពួកគេស្រលាញ់ភេទផ្ទុយ ឬដូចនោះទេ អោយតែពួកគេពិតជាស្រលាញ់គ្នា។» ស្ត្រីជាម្ដាយម្នាក់សរសេរ។

ការសរសេររបស់ពួកគេទទួលបានការគាំទ្រជាច្រើន ដោយការចុចប៊ូតុងចូលចិត្ត និងប៊ូតុងបេះដូង។ ស្របគ្នានេះដែរ ក៏មានមនុស្សមិនតិចដែរ ដែលចុចប៊ូតុងខឹង ដើម្បីសម្ដែងការមិនពេញចិត្ត និងសរសេរពាក្យឡកឡាយមួយចំនួនផងដែរ។

«អញ្ចឹងម៉ិចមិនទៅរៀបការជាមួយមនុស្សប្រុសទៅ? ដូចនេះអ្នកអាចបង្ហាញការគាំទ្ររបស់អ្នកបានហើយ។» អ្នកស្រលាញ់ភេទផ្ទុយជាច្រើនសរសេរន័យស្រដៀងគ្នានេះ។ «ដូចនេះពេលដែលកូនប្រុសរបស់អ្នកធំឡើង កុំភ្លេចអោយគេរៀបការជាមួយបុរសផង។»​ អ្នកផ្សេងទៀតបន្ថែម។

បន្តែហេតុអ្វី?

វាហាក់ដូចជាមិនសមហេតុផលសោះ តែបែរជាមានមនុស្សជាច្រើនគាំទ្រ និងគិតបែបនេះទៅវិញ។ ពួកគេហាក់បង្ហាញអោយឃើញថាការសើចចំអកចំពោះគំនិតរបស់អ្នកដ៏ទៃវាគឺជារឿងត្រឹមត្រូវ និងធម្មតា។ តែទង្វើរបែបនេះវាបែរជាធ្វើអោយពួកគេមើលទៅហាក់ដូចជាមនុស្សខ្វះការគិតពិចារណាទៅវិញ ដែរទាមទាបែបឡកឡាយអោយអ្នកស្រលាញ់ភេទផ្ទុយមកស្រលាញ់ភេទដូច ទាំងដែលគាត់ជាមនុស្សរៀបការហើយ។ 

ហេតុអ្វីដែលគាត់មកត្រូវធ្វើបែបនេះ​ បែបនោះតាមការបញ្ជារ ទាំងដែលគាត់ក៏មានការគិតជារបស់ខ្លួនឯង។ ហេតុអ្វីដែលគាត់ត្រូវទៅរៀបការជាមួយបុរសវិញនោះ បើគាត់ជាអ្នកស្រលាញ់ភេទផ្ទុយហ្នឹង ហើយក៏បានរៀបការហើយផងដែរ? ហើយមានហេតុផលអ្វីដែលគាត់ត្រូវកំណត់អោយកូនប្រុសរបស់គាត់ ត្រូវតែរៀបការជាមួយនិងមនុស្សប្រុស ទាំងដែលយើងគ្រប់គ្នាក៏ពុំទាន់ដឹងនៅឡើយ ថាគាត់ជាអ្នកស្រលាញ់ភេទដូច ឬផ្ទុយ?​ ម្យ៉ាងទៀត គាត់ក៏មានការសម្រេចចិត្តជារបស់ខ្លួយឯង។

ហេតុអ្វីចាំបាច់ធ្វើជាមនុស្សដែលចូលចិត្តកំណត់ជីវិតរបស់អ្នកដ៏ទៃ? កាតព្វកិច្ចរបស់មនុស្សយើងម្នាក់ៗ គឺរៀបចំគ្រួសាររបស់ខ្លួនយើងផ្ទាល់ ឬមិនមែន? មនុស្សយើងមិនរស់នៅតាម សភាវៈគតិ ដូចសត្វដែលធ្វើតាមគ្នាពីមួយជំនាន់ទៅមួយជំនាន់នោះទេ។ យើងតែងតែមានការផ្លាស់ប្ដូរ និងការគិតជារបស់ខ្លួនឯង អ្នកដ៏ទៃក៏ដូចគ្នា។ 

ពួកយើងក៏ដឹង មិនអញ្ចឹងឬ ថាពួកយើងមិនចាំបាច់មានឈាមជ័រជាសត្វសុនខដើម្បី ទាមទារអោយមានការឈប់បរិភោគសាច់សត្វសុនខនោះទេ។ ពួកយើងក៏មិនចាំបាច់ទាល់តែជាជនពិការ ដើម្បីចូលរួមគាំទ្រសិទ្ធរបស់ជនមានពិការភាព។ ពួកយើងក៏មិនចាំបាច់ជាមនុស្សស្រី ដើម្បីអាចគាំទ្រសិទ្ធរបស់ស្ត្រីដែរ។

ដូចគ្នានេះដែរ អ្នកក៏មិនចាំបាច់តែជាអ្នកស្រលាញ់ភេទដូចគ្នា ទើបអាចគាំទ្រ និងអបអរសារទរសិទ្ធរបស់អ្នកស្រលាញ់ភេទដូចគ្នានោះទេ។ អ្វីដែលអ្នកត្រូវមាននោះ គឺមនុស្សធម៌ និងបេះដូងដែលមាននៅក្នុងខ្លួនរបស់អ្នក ហើយបើកបេះដូងអោយទូលាយក្នុងការទទួលយកការពិតមួយទៀតដែលវាប្រហែលជាមិនដូចទៅនឹងការពិតរបស់អ្នក។

ភាគច្រើន មិនបានមាននិយមន័យថា «ការពិត» នោះទេ។ អ្វីដែលយើងមិនធ្លាប់បានឃើញ ក៏មិនប្រាកដ៍ថាមិនធ្លាប់កើតមានឡើងដែរ។ ត្រូវសិក្សារស្វែងយល់ពីវាជាមុន មុននឹងយើងកាត់ក្ដីអ្វីមួយថាខុសឬត្រូវ៕